北海道五天輕鬆遊 – 溫泉篇

第二日傍晚快速睇完雪祭又要雞咁腳走, 再坐粒幾兩粒鐘車返返上登別マホロバ温泉酒店…依間溫泉酒店個大浴場確實係水晶去過o既最大間 食完飯, 抖一陣就開波同堂妹去浸浴也~~

 

次次去親浸溫泉都有一個好強烈既感覺…就係原來香港人o係大浴場入面係好怕羞架…因為十居其九佢地會閃閃縮縮去浸, 一定唔會好坦蕩蕩(雖然大家都係肉帛相見)好開懷咁去享受…大部份o既香港人一定會用o個條遮到上又遮唔到下o既毛巾仔遮著身體其中既一部份 (其實咁怕羞既話水晶會建議遮住塊面, 哈哈!)

 

我同堂妹逐個池都浸下…由室內到室外…気持が良いですね…感覺好正呀!!!

 

不過, 唔知係未o係室外浸o既時候唔覺意"攝親", o個晚連續打左幾個"乞痴", 第二朝開始有少許流鼻水…

 

原本五日四夜o既旅程中有三晚都可以浸溫泉o既…不過被o個個柒頭導遊攪禍晒, 結果得第二晚同最尾一晚可以浸

 

最尾一晚住o既酒店叫Apa Resort & Spa 據聞間酒店唔係全新, 只不過係近年從身裝修過轉做 Resort Hotel唶…

 

相比登別マホロバ温泉酒店, 依間酒店既規模比較細, 個大浴場只有Maroroba既三份一到…不過依間大浴場有兩個木桶浴盆放o係室外, 如果同友人去浸, 一人浸一個浴桶都幾好feel! 另外, 依個浴場有個小小既桑拿房, 房入面可以睇電視, 設計都幾週到

 

最尾一晚堂妹因為要同個"o急"搏鬥 (佢o黎o既時候將屋企大部份既日常用品都已經放左入o急, 加上黎到大購物, 所以好懊惱咁唔知D野點擺), 所以我自己一個人孤零零落去浸.

 

不過, 因為個場太細喇, 落到去基本上周圍都係人…連沖涼既地方都爆晒…水晶好好彩, 一落到去o岩o岩有一個位可以沖涼 (其實係水晶離遠見有人好似走, 比前面d人行快兩步唶) 太多人之緣故 (某些華裔人士說話好大聲, 好嘈! ), 水晶是晚前後浸左一粒鐘就返上樓o路!

 

つづき…待續…